Ihre Browserversion ist veraltet. Wir empfehlen, Ihren Browser auf die neueste Version zu aktualisieren.

Tegia Culm dall'Alp MoraTegia Culm dall'Alp Mora

Kühe in VadresKühe in Vadres

Da quater ad ina alp da vaccas

Las alps da Trin ils davos 50 onns

Remo Casty, Trin

En quei artechel less jeu dar ina cuorta survesta dallas alps da Trin dils davos decennis, suenter che Hans Erni ha giu descret iI svilup alpester tochen ca. 1950.

 

Las alps denter 1945 e 1953, tegias e tschalers da caschiel

Tochen igl onn 1953 possedeva Trin quater alps da vaccas, numnadamein l'Alp Mora, Lavadignas, Surcruns e Raschaglius. Mintgina da quellas vegneva cargada cun ca. 45 tochen 50 vaccas, 36 tochen 40 genetschas e 35 tochen 40 vadials. Sco alp da mugias - ca. 125 tocs surveva il CuIm da Sterls. Las nuorsas - da lezzas uras ina muntanera da ca. 700 tocs – vegnevan cargadas ell'Alp Mora dadò: ellas pasculavan era Plauncadira cun las Palas Cavagl ed il Tschep Sut duront ca. treis jamnas.

Per las quater alps da vaccas possedeva Trin en tut 12 tegias da caschar e quater tschalers da caschiel; plinavon dev'ei aunc a Bargis il bargun cun in pign nuegl e cun combras da durmir (sin strom). Sil Culm da Sterls existevan treis tegias pils pasters da mugias. E per ils nursers dev'ei mintgamai ina tegia ell'Alp Mora dadò ed a Plauncadira. Pia in diember total da 21 baghetgs che muntavan bia lavur e stenta per iI manteniment.

 

Ruchegiar las tegias e pinar lenna

Ruchegiar ina tegia vuleva gir transponer ella - demontar, transportar ils elements cun carr e cavagl ni sin schui e tschentar si en I'auter liug d'in stavel a I'auter tenor igl areal da pasculaziun dalla biestga. A Trin ruchegiav'ins las tegias a Bargis e sill'Alp Mora (Tegia Sut e Culm). Quellas tegias eran construidas cun tromas da lenn encastradas els cantuns che seschavan levamein prender dapart e metter ensemen puspei en I'auter stavel. Ina da quellas tegias ei aunc mantenida sin l'Alp Mora e vegn duvrada sco remisa. Igl onn 1944 ei la tegia dil Culm da l'Alp Mora vegnida baghegiada da niev, suenter che quella da lenn ch'ins ruchegiava era per dar ensemen.

La lenna da diever per las tegias da caschar vegneva pil pli pinada els uauls vischinonts, beinduras ina lavur intensiva per zezens cun carr e cavagl. - In eveniment special d'autra tempra ei aunc en buna memoria a mi: Duront la secunda uiara mundiala era la lenna da brisch scarsa. Cheu han in per umens da Trin entschiet a runcar zundra (schembra) a Castruns (uaul e pastira da nuorsas). Ord quella lenna fagevan els cotgla sil plaz. Quei ha denton buca cuzzau gitg, pertgei in gi ha la zundra pigliau fiug ed ils pumpiers da Trin han stuiu serender sill'alp a stizzar. Naven da lu han ins calau da far la cotgla sil plaz. Perencunter han ins transportau la blocca-schiember cun ina suga da fier giu Raschlaus; ligiond la lenna en buordis e pendend ella vid in crutsch da lenn. Lu schulava la carga qiuadò en in buc da lenn e sgulatschava pil plaz entuorn. Da leu naven vegneva la lenna menada cun in tractor cun «Holzvergaser» giu Mulin, nua che ella vegneva barschada en cotgla a Parlatsch sper via. D'observar quei transport era per nus buobs ina interessanta caussa. - In per onns pli tard, viaden els onns 50, veva puspei in accordant, cun il consentiment dil cussegl-vischnaunca, surpriu da pinar in ton dalla zundra si Castruns. Strusch ch'el veva entschiet cun sia lavur, ha l'Uniun da traffic da Flem fatg tgisa tiel cantun, il qual ha immediat scumandau da pinar lenna en quei liug.

 

Regurdientschas dalla cargada e dil temps sco paster pign

Jeu seregordel aunc da buob (ca. 1944) dil gi dalla cargada si Bargis. IIs pursanavels arrivavan cun lur muvel, in pli baul e I'auter pli tard. IIs purs dalla caschada da Raschaglius seplazzavan sigl ur dalla via da maun seniester dil plaun da Bargis, quels da Surcruns da maun dretg. Lu sededicavan els al magliar e beiber ed al ruassar in mument suenter il stentus viadi. Silsuenter fagevan ils caus-tegia in appel dalla biestga che mintgin haveva cargau e lu ordinavan els las lavurs allas differentas gruppas da purs, lavurs che stuevan vegnir fatgas il gi dalla cargada. IIs biars stuevan pinar e semtgar la lenna per la stad egl uaul da Prau Parli, tut lavurs da maun. Auters havevan dad ir a far seiv sper la val da Lavadignas cun truscals e pigneuls. Schebein ch'ins sespruava da clauder e segirar quella val aschi bein sco pusseivel, ha ella caschunau la mort a biars vadials. La spunda era tessaglia ed il pastg oramai buns e quei caztgava ils vadials d'ir tochen orasum e cun sevolver cupitgavan els e mavan a smerscha. Naven dils onns 50 cu ins ha erigiu seivs cun fildirom e batterias ein las sperditas d'animals idas fetg anavos, ed ozilgi vegn quei sistem praticaus cun grond avantatg en tuttas alps.

Il gi dalla cargada si Bargis eran ils purs dallas duas caschadas sco sin in butschin da puorla. Ei duvrava lu buca bia, pintgas differenzas da meinis, ch'ei plidavan pli e pli dad ault. Ei regeva cheu adina ina certa gnervusadad. Quei derivava dil cunfar cun la biara biestga ch'era sin il plaun da Bargis (ca. 240 tocs) e lu era dil mulscher che schischeva als biars sil magun. La sera vegneva controllau co il mulscheder d'alp saveva mulscher. Mintga pur haveva da tener sias vaccas duront quei act. IIs mulscheders eran vegni partgi tier entras trer la sort sil «cumin da caschada» gia avon la cargada. Las empremas seras era ei buca adina lev da mulscher el stavel, cunzun sch'ei fageva fetg cauld; meglier mava ei la damaun, lu haveva ei neginas mustgas. Denton da macort'aura e plirs gis da plievgia sfundravan ils mulscheders ella buglia e rabitschavan bunamein buca ora la sutga da mulscher. Igl onn 1970 ha ei giu dau nevadas, aschia ch'ins ha saviu cargar Bargis e contuorn per ils 30 da zercladur e Surcruns e Raschaglius che eran lu aunc cuviartas cun nevaglias per lunsch viaden el fenadur. – Cun avanzar dalla stad era la fumeglia d'alp disada vid la lavur da mintga gi che daventava era in tec alla ga pli leva, aschia ch'il persunal saveva plitost selegrar dil temps dad alp. Il persunal d'alp secumponeva sco suonda: Sin mintgina dallas quater alps da vaccas duvrava ei tschun persunas, numnadamein in signun, in zezen en tegia (piI pli in mattatsch da 14 tochen 16 onns), in zezen da lenna , in paster ed in paster pign. Quei davos uffeci vegneva confidaus ad in buob dad otg ni nov onns ensi e fuva en sesez la pli stentusa piazza. II paster pign haveva da levar culs auters entuorn las treis e mesa la damaun e dad ir a raspar (da stgir) las vaccas. Da bial'aura mava ei aunc. Mo da macort‘aura e tschaghera era quei per in buobet buca lev. Ei entscheveva cun da trer en ils calzers bletschs dalla sera avon. Quei era bia gadas torturas. Da lezzas uras deva ei aunc negins stivals da gumma. Suenter raspar fuva ei da tener las vaccas el stavel, spert magliar ensolver e lu gidar a catschar il muvel sin pastira; silsuenter turnar anavos e far controlla dils vadials e catschar ensemen els. Bia gadas stuev'ins ir urialas ad encurir els. La sera mava ei puspei vinavon: Tener en stavel, ir cul muvel a dar entir (tscheina) tochen far notg. Il paster pign resenteva pil pli buca bia dil maletg idillic e romantic dalla veta dalla fumeglia d'alp che vegneva meinsvart idealisaus pli baul ella poesia alpestra!

 

Midadas digl onn 1953, zoppina 1957 e barschament d'uaul 1961

Sin il «Cumin» (radunonza communala) dils 8 da november 1953 fuva ina ga dapli tractandau, suenter Iiungas debattas e discussiuns, «las alps ». Ina idea digl expert dall 'alpicultura, Christian Walkmeister dil Plantahof, exprimida 1949 duront in'uatga, da seconcentrar sin l'Alp Mora e sin Lavadignas sco alps da vaccas e da construir leu baghetgs moderns, ei buca vegnida persequitada vinavon. Perencunter ei vegniu decidiu cun grond surpli da far la suandonta midada: Da buca duvrar pli l'Alp Mora sco alp da vaccas, mobein da cargar leu 95 genetschas e ca. 50 vadials. Plinavon dad alzar en las treis alps Lavadignas, Surcruns e Raschaglius il diember da vaccas tochen mintgamai 65 e da scursanir il diember da schetgs (genetschas e vadials) sin mintgamai ca. 20 resp. 30 tocs.

L'Alp Mora era gia stada inaga alp da genetschas, numnadamein dils 1880 tochen 1883. Schebein che quella pratica era buca secumprovada lu, ein ins returnaus tier ella ils 1953. In motiv persuenter para che la misergia d'aua sill'Alp Mora seigi stada. Sper las genetschas dils purs da Trin han ins ils 1953 aunc cargau 50-60 vadials. Naven dils 1958 han ins schau vi l'Alp Mora a purs da Grüningen e contuorn, ils quals han cargau leu entuorn 300 tgaus, genetschas, mugias e vadials.

Ina gronda surpresa ha ei dau encunter la fin d'uost 1957: La zoppina (Maul- und Klauenseuche) ei rutt'ora sin l'Alp Cassons da Flem. Lu regeva in grond traffic da turists che vegnevan sur la Fuorcla da Raschaglius a Bargis. Las autoritads cantunalas han immediat reagau e serrau il traffic da persunas. Ellas han plinavon ordinau da virolar tutta biestga sin las alps da Trin e Flem, denton era sin quellas da Lags, Schluein e Sagogn. Mintga caschada da Trin ha tarmess sin sia alp quater purs che han ensemen cun in veterinari giu da virolar la biestga . Igl ei buca stau ina leva lavur da vegnir vitier als animals; mintga tier stuev'ins pigliar e tener per saver virolar el. La lavur era tonpli stentusa ch'ei regeva in'aura terribla cun plievgia e neiv. Aschia eis ei denton reussiu d'impedir che la malsogna ei sederasada, e per cletg ha ella buca contonschiu las alps da Trin.

Il settember 1961 ha il militar caschunau in barschament immens cun sittar da Raschlaus (Bargis) si encunter il Muletg da Castruns. La muniziun glischonta (Leuchtspur) ha dau fiug agl uaul da schiember che ardeva tgunschamein, essend ch' ei era schitgira da quei temps e la val Muregg dagitg schetga. Cun negin'aua lunsch entuorn er'ei bunamein nunpusseivel da stizzar. Quei barschament ha cuzzau in per gis. Per cletg ha ei giu negin vent dil vest, aschia ch'ins ha pudiu retener il fiug ch'el ha buca tuccau il Tschenghel. Da vart seniastra ensi ha ei denton barschau giu igl entir uaul tochen si encunter il Tschep. Ei ha cuzzau biars onns tochen ch'ins ei vegnius tier ina sligiaziun cun il militar. Cantun e Confederaziun pretendevan da puspei plantar en tut quei ch'era barschau. IIs cuosts fussen stai immens gronds ed il success, sch'ei creschi fuss staus pigns. La zundra drova en quella altezia decennis e tschentaners tochen ch'ella crescha suenter. Ins ei lu vegnius perina, ensemen cun iI bostger circuital , da far cun in ton da quels daners ina via battida dil plaun da Bargis en e da construir giu en la Grava in grond refugi per la biestga en cass da neiv: Cun ina seiv stabila e cun in Iiung pursepen cun tetg per saver perveser il muvel. Il fein persuenter vegn transportaus si da Trin. Aschia han ins dapi lu in grond levgiament ch'ins sto en cass da neiv buca untgir culs muvels ord I'alp.

 

Novs projects 1957-1971

Il niev uorden da 1953 ha denton buca cuntentau. Ins disponeva da negins nuegls ellas alps e da gis da neiv stuev'ins ir a casa cun la biestga. Tractandum principal dil «Cumin» dils 24 d'uost 1957 fuva «Orientaziun appartenent midadas dallas alps da Trin ». Sco experts d'alp fuvan presents dr. Gion CIau Vincenz (Cuera) e Hasper Pieder Casutt (Falera). Quels signurs han proponiu da destinar l'Alp Mora e l'Alp Lavadignas sco alps da vaccas e da far ord Surcruns e Raschaglius alps da genetschas e vadials. L'Alp Mora duessi purtar ca. 100 vaccas e 50 tochen 70 vadials e Lavadignas ca. 100 vaccas. En omisduas alps duessen novs nuegls e tegias vegnir erigi. II latg dad omisduas alps duess vegnir transportaus en dus conducts en cascharia a Trin. Quellas propostas ein vegnidas approbadas en votaziun cun 54 encunter 1 vusch. Plinavon ei vegniu concludiu da quella radunonza da schar far in preproject per 10'000 francs per igl entir intschess dallas alps da Trin, pia da slargar las propostas dils experts; ins era generalmein dil meini ch'in project cun cuosts da plirs milliuns porti era pli bia subvenziuns. Mo naven da quei «Cumin» digl uost 1957 ei aunc curriu bia aua dalla Val Pardi giu. Ei ha duvrau bia sesidas e cumissiuns tochen che quei project ei staus madirs. Probabel eis ei era stau bien aschia, pertgei suenter quella liunga fasa da project han ins viu ch'ei tonschi cun ina alp da vaccas, numnadamein cun l'Alp Mora. En quei senn ei il biro d'inschignier Bruni da Cuera vegnius incaricaus. Quel ha concepiu in nuegl niev cun indrezs per maschinas da mulscher per 130 vaccas, ina tegia nova ed ina gronda puschinera moderna. Sil Culm sco secund stavel ei vegniu previu ina tegia ed in stan da mulscher. In grond project fuva il conduct d'aua che dueva tschaffar 15 fontaunas e cumpigliar reservuars cun total 170 m3 volumen e lingias d'aua da 6,9 km. Plinavon er'ei da projectar ina lingia da latg („pipeline“) da 5,3 km cun bischels da «simolen» naven dall'Alp Mora tochen el vitg da Trin. IIs cuosts han buca astgau esser pli aults che 9000 francs per plaz da vacca. Aschia ei la summa totala per igl entir project vegnida fixada sin 1,2 milliuns francs.

 

Alp Mora moderna 1971 e novs uordens

Suenter che la vischnaunca da Trin ha giu acceptau iI sura numnau project, han era il cantun e la confederaziun fatg il medem e segirau 1969 las subvenziuns necessarias. Aschia han ins saviu ir vid I'execuziun dall'ovra ch'ei vegnida baghegiada duront las duas stads 1969/1970. Igl act d'inauguraziun sill'alp ei staus in eveniment nunemblideivel per I'entira populaziun da Trin e per biars hosps da lunsch e da maneivel. Cun grond plascher han ils purs cargau l'Alp Mora ils 1971 cun ca. 115 vaccas. Mo aunc iI medem gi dalla cargada ha ei dau giu neiv, aschia ch'ins ha stuiu perveser en la biestga duront dus gis. Ferton ch'ins stueva pli bauI ir a val cun la biestga en tals cass, han ins sentiu ussa ils avantatgs dil niev indrez: ins ha saviu mantener il muvel en nuegl d'alp.

In ulteriur grond avantag ha era I'installaziun dalla forza electrica e dil telefon muntau. Il current electric vegneva furnius d'in generatur da «diesel». La lingia da telefon ch'ins ha installau naven dil Culm engiu ei vegnida messa ella lingia dil conduct da latg. Quei cabel ch'era deponius mo aschia el dutg ei buca secumprovaus. Pertgei tier mintga camegiada e tunada ch'ei deva en sia vischinonza era la lingia interrutta ed ina equipa da telefon stueva mintgamai encurir nua ch'il donn seigi e reparar quel. Per cletg mava quei sin cuost dalla PTT. Suenter treis onns han els aviert aunc inaga il dutg e mess iI cabel en bischels. Dapi lu han ins giu ruaus e mai pli disturbis.

IIs 1976 ei vegniu decidiu da brattar I'alp da nuorsas ell'Alp Mora dadò cun il Culm da Sterls, e quei cun tuts dretgs da pascular e da gis da neiv. IIs dretgs da neiv en quei intschess sur Bargis (Culm da Sterls, Surcruns e Raschaglius) eran da vegl enneu regulai suandontamein: Dev'ei neiv ch'ins saveva buca paschentar la biestga e ch'ins stueva bandunar ils stavels sisum, sche havevan:

a) las mugias da Culm dad ir igl emprem encunter Surcruns e dils Crauns giu la Rusna ed ora Plaun da Vadres,

b) iI muvel da Raschaglius dad ir giu Vadres dador la Camutschera sper tegia e

c) la biestga da Surcruns da serender giu el Muletg sut Rusna dadens la Camutschera. – Cun la biestga da Lavadignas er'ei d'untgir giu egl uaul, e sche quei tunscheva buca veva ella il dretg dad ir a Raschlaus. In signun vegl da Trin ha raquintau igl onn 1934 ch'els hagien giu stuiu bardigliar 13 gadas da Surcruns giu la Rusna cun tut quei da caschar!

Naven dil brat appartenent las nuorsas dall' Alp Mora el Culm da Sterls, ein las mugias vegnidas cargadas sin l'Alp Lavadignas - aunc cun enzatgei vadials, en tut ca. 150 tochen 160 tocs. - IIs antenats fussen sevulvi en fossa, sch'els havessen enderschiu quella midada: Per els valeva l'Alp Lavadignas sco megliera alp da vaccas! Denton, il temps stat buc eri, e jeu sundel perschuadius ch'ei vegn a dar, tenor il ritmus dad oz, aunc midadas radicalas el sectur agrar, buca mo sillas alps.

Aunc ina novaziun datescha dils 1971. Avon quei temps vegnevan ils caus-tegia eligi mintg'onn, essend che quei post era buca tschercaus. Mintga caschada haveva in cautegia; quei uffecimava en roda, ella roda eran mintgamai treis purs, e denter quels stueva in surprender igl uffeci. Sch'in fageva ei buca da libra veglia, vegneva ei tratg la sort. - Naven dils 1971 regia in niev modus, tenor iI qual ils caus-tegia vegnan eligi per treis onns. Per I'alp ei quei bia pli adattau; aschia ha ei dau caus-tegia che han funcziunau duront 15 tochen 20 onns, en singuls cass schizun trent'onns . – Era appartenent partgir en la biestga han ins midau la pratica. Pli baul vegneva quella partgida fatga dil cussegl vischnaunca ensemen culs caus-tegia. Quei deva lu liungas discussiuns e sesidas che cuzzavan mintgaton sur mesanotg ora. La difficultad era d'ulivar ora endretg la biestga sin tuttas quater alps da vaccas per che negin vegni alla cuorta. Pervia d'in bov ni d'in vadi fuv'ei mintgaton da discutar entiras urialas. Naven dils 1971 ei quei vegniu pli sempel: Il cau d'alp prenda si sez la biestga e partga tier quella a sias alps. - Las reglas empau cumplicadas d'antruras derivavan era dil fatg ch'ei deva lu bia dapli purs che oz. Bunamein mintga casada haveva in menaschi da pur. Tenor vegl usit vegneva pli baul era clamau en il «cumin d'alp» per decider sur dalla cargada sin ina sera dallas 19.30 uras cun tuccar il zenn pign, e quei duas gadas en in interval da ca. tschun minutas. Sco persunas pli veglias raquentan muntava igl emprem tuchiez dad alarmar ils purs per setarschinar , ed il secund tuccar vuleva regurdar els da semetter sin via. Tochen 1970 vegneva il «cumin d'alp» ni «cumin da caschada» menaus dil president communal, suenter quei termin fa quei il cau d'alp. Avon la sera da «cumin d'alp» veva ed ha aunc oz ina cumissiun da treis umens dad ir tras tuttas alps e da controllar co ei stetti cun I'jarva. Lur rapport ch'els dattan giu avon il «cumin d'alp» ei decisivs per fixar il gi dalla cargada. Appartenent il pustretsch (quen ni tscheins d'alp) vala aunc oz il medem uorden sco pli baul. En cass che zatgi perda in animal sill'alp ni ch'in biestg sto vegnir menaus ord I'alp vala il suandont dretg: Per las empremas treis jamnas ha in da pagar nuot, naven dalla tiarza tochen I'otgavla jamna paga el la mesadad, e suenter otg jamnas d'alpaziun sto in pagar igl entir pustretsch.

En tut priu san ins esser oz fetg cuntents cun las sligiaziuns e novaziuns fatgas entuorn ils onns 1971 e suandonts. Igl ei da giavischar che era en futur, en in temps cun aunc pli paucs purs, las alps daTrin possien vegnir mantenidas e cultivadas en bien uorden. Igl ei bein in'incarica dall'entira populaziun da gidar a conservar las alps per nos vegnentsuenter sco part impurtonta da noss'ierta culturala.